Who go be Kamala Harris running mate and under wat conditions?

https://www.bbc.com/pidgin/articles/cn05nerplx7o

Since wen U.S. President Joe Biden don end im re-election campaign to endorse Vice President Kamala Harris to take im place as di Democratic Party nominee, plenti kwesion don dey show face.

One big kwesion na who go be running mate to Kamala Harris as she dey front to become di Democratic candidate wey go face opponent Donald Trump for di US Election.

Di whole mata wey dey happun for di election dey come four months bifor Americans go decide who go be dia new president for di White House.

Dem fit replace Joe Biden as Democratic nominee and under wat conditions?
Democrats dey reason Kamala Harris to replace Biden - but she go fit beat Trump to be US president?
Who win di Trump-Biden presidential debate?
Kamala Harris officially sign di form wey she use declare her candidacy for di position of di President of US. She sign di form on 27 July 2024.

Who go be Kamala Harris running mate?
Na different situations fit play out for di next coming days and weeks,as to how Kamala Harris go pick who go be her running mate.

Di Republican Donald Trump don already pick JD Vance as im running mate and all eyes dey for di Democratic to choose who go dey di ballot in di coming election.

Kamala Harris go gatz pick her running mate by di time wey di Democratic party delegates go vote next month for dia convention wey go hold wia dem go confam who go dey dia presidential ticket.

By history, dem dey always pick vice president base on how dem go complement di presidential candidate.

But who Kamala Harris go like pick? E get some names wey don already dey spotlight and fit dey considered to be running mate.